Verslað í matinn

Það er ákveðin reynsla að fara út í búð í Þýskalandi. Hér er ákveðið kerfi sem maður þarf að fara eftir, annars lendir maður í vandræðum, allavega leiðindum. Maður setur vörurnar á færibandið og afgreiðslufólkið stimplar þetta inn, svo er ekkert pláss hinu megin við færibandið til að setja vörurnar í poka. Maður verður að setja þær allar aftur í körfuna og fara að sérstöku pökkunarborði og raða þar í pokana. Sem er svo sem allt í lagi ef maður er með körfu, en ef maður er ekki með körfu þá þarf maður að vera helvíti fljótur að henda öllu jafn óðum ofan í pokana, annars koma vörur næsta kúnna og blandast við manns eigin vörur, öllum til mikils ama. Þetta er ansi erfitt ef maður er ekki með körfu (oft gleymi ég að taka með mér smápeninga, því maður þarf að hafa nákvæmlega einnar evru smápening til þess að geta fengið lánaða körfu), því stundum lendir maður með allar vörurnar í fanginu og reyndir að henda sér yfir á pökkunarborðið í von um að eggin eða jógúrtin detti ekki í gólfið og splundrist. Sem hefur komið fyrir. Svo er annað, flestir taka með sér poka, tösku eða hverskyns ílát undir vörurnar. Það tíðkast ekki að biðja um poka, sérstaklega ekki um litlu fríu pokana, þá verður afgreiðslufólkið pirrað og biður mann vinsamlegast um að muna að taka með poka næst. Svo það er eins gott að koma vel búin í búðirnar, með einnar evru smápengin, taupoka og tækni sem gerir manni kleift að henda vörunum fljótt í körfuna eftir innstimplun og pakka vel ofaní taupokana við pökkunarborðið á sekúndubroti. Jamm.

Sá annars sætan strák í búðinni áðan. Sá hann álengdar í búðinni og hugsaði með mér að það væri skömm hvað ég væri drusluleg í dag, annars hefði ég nú getað gefið honum auga. Svo lenti ég fyrir aftan hann í röðinni við kassan og var fljót að missa álit á þessum sæta strák. Hann var með grænan bakpoka, sem var kannski fínn fyrir tíu árum þegar hann var í heilu lagi. En hann var ekki fínn lengur og ekki í heilu lagi. Hann var gauðrifinn og stráksi var búinn að HEFTA hann saman. Já, þetta gera þjóðverjarnir til að spara penginana. Prima leben und sparen. Það má ekki gleyma þjóðarmottóinu. Hann var líka í götóttum skóm og þarf eflaust að dusta göturykið af sokkunum þegar hann kemur heim á kvöldin. Ef hann týmir þá að kaupa sér sokka. Já, sætu strákarnir hlýða líka þýskum lögmálum.