Nýtt ár og ný íbúð

kinverskt nyar
Originally uploaded by austurfari.

Ég er loksins búin að ákveða mig með íbúðarmál. Ætla að flytja í íbúðina litlu í Reudnitz, sem er ekki eins skemmtilegt hverfi og ég bý í núna, en samt ekki svo langt í burtu. Íbúðin er mjög fín, ég fæ að halda eldhúsinu gegn því að mála og ég er búin að fá mannskap í það nú þegar ;) Ég má meira að segja flytja inn næstu helgi, sem er æði.

Annars fór ég í skemmtilegt partý á laugardaginn, kínverskt áramótapartý hjá Kun. Þar fögnuðum við 4350 (minnir mig) ári hjá kínverjum og Kun var búinn að biðja alla að mæta í rauðum fötum sem boðar víst mikla lukku. Ég held ég hafi nánast verið sú eina sem mætti í rauðum fötum, enda átti ég ekki í vandræðum með það þar sem rauður er minn uppáhalds litur (amk. í fötum). Svo ég mætti í rauðu centrum-pilsi og rauðum rúllukragabol við og vakti mikla athygli og lukku ;) Á því von á mikilli lukku það sem eftir er árs, enda veitir ekki af eftir hrakföll síðustu viku. Ég fór til lögreglunnar á föstudaginn með hinni óheppnu stúlkunni og gáfum skýrslu, áhugavert að lenda í svona sakamáli hér í Leipzig og enn áhugaverðara að heimsækja lögreglustöðina!

Í dag flytur inn nýr meðleigjandi, vona að hann sé skemmtilegur, ekki verra ef hann er sætur og einhleypur líka, hohohoho.

Hér er áframhaldandi frost og fróðir menn segja að þetta sér einn kaldasti vetur í manna minnum hér. Ég er alveg að gefast upp á þessum kulda. Sem betur fer er þó bjart og sólin skín flesta daga, jibbí.